Dako ang nahimong tabang sa mga lumad ang gilusad sa Provincial Mining Regulatory Board nga temporaryong probisyon aron hatagan og permiso ang mga gustong magmina subay sa balaod sa Opol ug Manticao.
Sumala ni Misamis Oriental PLENRO Head Geran John Flores, nakatabang kini sa Dulangan Higaonon Ancestral Domain Association sa Barangay Awang sa Opol ug sa grupo ni Datu Rommel Mansilao sa Manticao tungod kay gitudloan ang mga residente sa sakto nga pamaagi sa operasyon.
Gibutyag sa opisyal nga dili bulawan ang gina-mina sa gihisgotang mga grupo kundi chromite nga usa ka matang sa mineral nga ginagamit sa paghimo og asero aron dili kini dali nga tay-on.
Dugang pa ni Flores, gipailalom sa 20 ka ektarya nga limitasyon ang matag operasyon sa Elsmad Chromite Mining ug sa ubang mga aplikante diin hugot nga gidili ang open-pit mining ug paggamit og mga bug-at nga kagamitan.
