Gisaway sa kanhi opisyal sa depensa ang kakuwang sa klarong baruganan ug lagda sa administrasyon bahin sa mga kritikal nga isyu sa nasyonal nga seguridad sama sa krisis sa West Philippine Sea.
Tungod niini, gipadayag ni kanhi National Defense Secretary Norberto Gonzales nga nagpabilin karong ngitngit ug walay tataw nga direksyon ang pamaagi sa kagamhanan nga gipatuman nila ni President Ferdinand Marcos Jr. ug Defense Secretary Gilberto Teodoro Jr.
Gitin-aw usab sa kanhi opisyal nga kaniadto aduna gayoy giumol nga Cabinet Cluster on National Security ang gobyerno tali sa Department of National Defense ug Department of Foreign Affairs aron usa ra ang mogawas nga opisyal nga pahayag.
Hinungdan nga gipahinumdoman sa kanhi kalihim ang Office of the President nga angay magpakita og usa ra ug gihiusang opisyal nga baruganan ngadto sa katawhan tungod sa nagpadayong krisis sa nasod.
