Non-partisan o walay gipihig nga paksyon ang petisyon sa United People’s Initiative, nga maoy pangunang kalainan niini kumpara sa unang tulo ka apela nga gipasa sa ubang grupo bahin sa voting threshold sa impeachment court.
Gitin-aw sa legal counsel sa organisasyon nga si Atty. Melchor Magdamo nga gihimo ang maong prayoridad aron masiguro ang kaangayan ug patas nga hustisya sa balaod.
Gipasabot sa abogado nga nakatutok ra alang sa kaayohan ni Vice President Sara Duterte ang mga unang mosyon gikan sa kampo nila ni Atty. Vic Rodriguez, Ernest Francisco, ug Berteni Causing.
Tungod niini, gisiguro sa grupo nga masakop sa apela ang tanang impeachable public servants lakip na ang mga huwes sa Supreme Court aron matul-id ang patakaran.
