Gipadayag ni Majority member Konsehal Jing Daba ang personal nga opinyon ug kasinatian sulod sa 85-anyos nga City Hall isip rason sa paghatag og suporta sa 8.5 billion pesos nga loan alang sa bag-ong Government Complex.
Gisaysay sa opisyal ang personal nga obserbasyon nga peligroso na ang mga pasilidad sama sa gubaon nga aircon ug dili pantay nga tayls diin pila ka beses nga hapit mahulog ang mga naggamit sa hagdanan.
Apan gihupay sa konsehal ang kabalaka sa oposisyon pinaagi sa pagklaro nga dili dunganon sa pagpagawas ang tibuok pondo kundili hinay-hinay kini nga ipagawas subay sa matag hugna sa pagpalambo.
Tungod sa gipadayag nga panan-aw, nanawagan ang opisyal nga ilabay na sa daplin ang politika kay matod pa “Cagayan de Oro needs a new home, move on na ta” alang sa mas maayong serbisyo sa dakbayan.
