Gikinahanglan ang padayong paghimo og Threat Assessment sa mga eskwelahan aron sayo nga mailhan ang mga hulga ug posibleng peligro nga mahimong mosangpot sa krimen, sumala ni Dr. Warren Corpuz sa Professional Regulatory Board of Criminology.
Giingon ni Dr. Corpuz kini taliwala sa sunod-sunod nga insidente sa pagpamusil sa mga eskwelahan sa nasud nga nakaapekto sa kinabuhi ug kaluwasan sa mga estudyante ug mga magtutudlo.
Matod sa opisyal, makatabang ang mga criminologist sa mga administrador sa eskwelahan sa pag-ila sa hulga ug sa paghatag og tambag aron mapadayon ang kalinaw ug kahapsay sulod sa mga tunghaan.
Dugang pa niini, importante usab ang pasusi aron masabtan ang mga hinungdan nga nag-aghat sa kabatan-onan sa pagbuhat og krimen ug aron malikayan ang susamang insidente.
