Usa ka dakong pabor ug tabang sa mga micro-enterprises ang gilauman ni dating Oro Chamber Economic Development Committee Member Ray Talimio Jr. sa planong pagpatukod sa bag-ong Government Complex.
Gitin-aw sa opisyal nga gilangkuban sa dul-an 99% sa lokal nga ekonomiya ang mga MSMEs, diin kasagaran kanila naggahin ug taas nga oras sa pagpila ug pagproseso sa mga dokumento sa kasamtangang buhatan.
Pinaagi sa mas dako ug mas haom nga pasilidad, mas mapadali ang mga transaksyon sa mga gagmay’ng negosyante pinaagi sa mas maayong Business One-Stop Shop o BOSS.
Kauban niining panlantaw, gidugang ni Talimio nga ang paghatag og maayong lugar alang sa mga lokal nga mga negosyante maghatag og lig-on nga suporta sa dagan sa komersyo sa tibuok dakbayan.
