Gitinguha ni Pangulong Ferdinand “Bongbong” Marcos Jr. nga mapalapdan ang paggamit sa mga electric vehicle o EV sa pampublikong transportasyon aron maminusan ang gasto sa gasolina ug madugangan ang kita sa mga drayber ug operator.
Gibisita sa Pangulo ang Green Mobility Hub sa Balanga, Bataan, diin gipakita ang mga electric bus ug e-tricycle nga mahimong gamiton sa pagpasahero. Sumala sa kalkulasyon nga gipresentar sa Pangulo, ang binulan nga gasto sa krudo sa usa ka gamayng bus nga mobiyahe og 200 kilometro kada adlaw mahimong moubos gikan sa ₱78,000 ngadto sa ₱9,100 kon mogamit kini og kuryenteng gikan sa solar power.
Samtang, ang binulan nga gasto sa enerhiya sa usa ka e-tricycle nga mobiyahe og 80 kilometro kada adlaw mahimong moubos gikan sa ₱6,800 ngadto sa ₱900.
Gipasalig usab sa Pangulo nga palapdan sa gobyerno ang pagtukod og susamang mga pasilidad sa Bataan ug sa ubang dagkong siyudad aron maminusan ang gasto sa operasyon sa pampublikong transportasyon ug ang polusyon, nga gilaoman usab nga makatabang sa pagpagaan sa gasto sa mga komyuter. (jane abulag)
