Napatay ang duha ka security guard ug tulo pa ka laing indibidwal human mipabuhagay sa lima ka missiles ang mga rebeldeng Houthi sa presidential palace complex sa dakbayan sa Aden sa habagatan sa Yemen niadtong Huwebes.
Luwas ug wala masamdan ang Prime Minister ug mga miyembro sa gabinete sa Yemen nga anaa sa sulod sa Maashiq presidential palace sa panahon sa pag-atake, sumala sa Information Minister nga si Moammar al‑Eryani.
Gipahayag sa tagapamaba sa militar sa Houthi nga si Yahya Saree nga ang insidente kabahin sa ilang pormal nga polisiya sa pagtarget sa mga Saudi military build‑ups bisan asa kini makita.
Sumala pa sa Houthi‑run Saba News Agency, ang ilang gibomba mao ang headquarters sa military operations sa mga opisyal sa Saudi Arabia ug ang imbakan sa mga armas nga nahimutang sa sulod sa complex.
