Gikompirmar sa Holy See Press Office nga milampus si Pope Leo XIV sa pagtawag kang Russian President Vladimir Putin, pinaagi sa telepono.
Tumong sa gi-inisyar nga dayalogo sa Santo Papa mao ang pagpalanog sa iyang kabalaka sa nagka-grabe nga humanitarian crisis sa lungsod sa Oleshky sa Kherson region.
Namayayag ang Vaticano nga nangayo ang Santo Padre sa kasiguraduhan nga ma-undang na ang mga pag-atake aron makaginhawa ang mga naipit nga mga sibilyan.
Gihangyo usab niini si Putin nga hunungon ang gubat aron mahatagan sa tambal ang mga samaran nga mga sibilyan ug kadtong mga nagmasakiton sa maong lugar.
Gipamugos niini nga kinahanglan adunay grupo nga mobuluntaryo nga muluwas sa mga na-ipit sa gubat batok sa Ukraine.
Gusto sa pinakataas nga lider sa Simbahang Katolika nga ipabakwit ang mga residente aron wala nay kinabuhi ang mausik kung ang ilang opsyon mao ang pagpadayon sa gubat.
Sa katapusang bahin sa ilang paghinabiay misugyot si Pope Leo sa lider sa Moscow nga hatagan sa luna ang diplomatikong dayalogo aron hingpit mabati ang kalinaw sa managsilingan nga nasud. Wala na misulti ang Vaticano kung unsa ang unod sa mga tubag ni Putin.
