Posibleng gusto i-normalize sa China ang pagbaras-baras sa ilang mga barko sa West Philippine Sea ug bisan sa kadagatang duol sa WPS. Kini ang obserbasyon ni Raymond Powell, Executive Director sa SeaLight Foundation.
Base sa pagmonitor sa ilang grupo sa miaging tulo ka tuig, nagpadayon ang pagsaka sa ihap sa gidaghanon sa mga barko nga gipadala sa Tsina sa West Philippine Sea.
Gipasabot sa experto nga ang fleet sa China Coast Guard ug maritime militia nagkadaghan ug nakadeploy na gikan sa Ayungin Shoal ug Escoda Shoal paingon sa Bajo de Masinloc ug hangtod na sa Batanes.
Gisulti ni Powell, sa BOMBO RADYO nga dili lang kini limitado sa mga shoal apan usahay ang mga barko mosulod duol sa baybayon sa Luzon ug Palawan.
Usa sa lig-ong ebidensya niini mao ang mga barko sa Tsina nga nakaduol na sa 25 nautical miles gikan sa baybayon sa Pilipinas aron ipakita ang ilang pag-angkon sa West Philippine Sea.
Tungod sa maong deployment, hugot ang pagtuo ni Powell nga naghatag kini sa seryosong hagit sa seguridad ug soberanya sa Pilipinas.
Kini na ang pinaka – agrisibo nga hagit sa China sa rehiyon isip kabahin sa ilang estratehiya sa pagpang-angkon sa mga teritoryo.
