Magpagawas ang Department of Labor and Employment (DOLE) og upat ka labor advisories sa bulan sa Nobyembre aron maprotektahan ang mga mamumuo batok sa grabeng kainit nga epekto sa gilaumang El Niño.
Gipahayag ni Acting Secretary of Labor and Employment Francis Tolentino nga ang una niini kay mahitungod sa Employees’ Compensation Commission, diin kwalipikado mudawat og bayad ang mga mamumuo nga nagkasakit tungod sa kainit o naangol samtang nagtrabaho.
Ikaduha, ang paghatag og abiso sa katawhan kung grabe na ang kainit ug pagsuspenso sa mga trabaho kung moabot ang Heat index sa peligrosong lebel pinaagi sa pakig-alayon sa DOLE ngadto sa DOST-PAG-ASA ug NDRRMC.
Ikatolo, ang paghatag og kahupayan ug proteksyon sa mga delivery riders nga ga-aghat sa mga konsumidor nga likayan ang pag-order og dili kinahanglanong mga butang sa oras nga grabe kaayo ang kainit ug tugotan ang mga rider nga magpahulay nga walay kahadlok nga matangtang sa ilang trabaho.
Ika-upat, ang pagtugot sa mga empleyado nga musuot og komportable nga mga sinina basi sa duha ka adlaw nga advance heat projections gikan sa DOST ug pag-usab sa oras sa trabaho ug pagpabalhin sa mga trabahante kung grabe na ang kainit.
Matud ni Tolentino, lakip sa gitutokan nila pag-ayo kay ang mga mamumuo nga permeng mabulad sa kainit sa adlaw.-
