Gipalanog ni Sen. JV Ejercito, chairman sa Senate Committee on Finance, ang kamahinungdanon sa transparency ug accountability sa pag-andam sa 2027 national budget.
Kini gisulti niya human sa desisyon sa Korte Suprema nga may kalabotan sa Unprogrammed Appropriations.
Atol sa budget hearing sa Department of Budget and Management (DBM), giingon ni Ejercito nga kinahanglan masiguro nga ang nasudnong badyet nahiuyon sa Konstitusyon ug matin-aw ang paggamit sa pondo sa gobyerno.
Matod pa niya, matag piso nga makolekta gikan sa buhis ug bayronon nagrepresentar sa paningkamot, pagpailob, ug sakripisyo sa katawhan.
Busa, iyang gihagit ang mga ahensya sa gobyerno nga siguruhong ang General Appropriations Act motahod ug magamit sa husto ang pondo alang sa tinuod nga panginahanglan sa mga Pilipino.
