Giisa sa Malacañang ang mas gipalawig nga serbisyo sa panglawas pinaagi sa Yaman ng Kalusugan o YAKAP Program sa PhilHealth sa gipahigayong press conference sa Cagayan de Oro City.
Gibatbat ni Palace Press Officer Undersecretary Claire Castro nga ubos sa maong programa, makapahimulos ang mga miyembro sa rehiyon og libreng konsultasyon sa doktor, laboratory tests, screening sa kanser, ug hangtod ₱20,000 nga balor sa libreng tambal matag tuig alang sa mga outpatient.
Makapahimulos sa maong benepisyo ang mga kawani sa gobyerno ug pribadong sektor, 4Ps beneficiaries, senior citizens, ug uban pang batakang sektor sa katilingban.
Tungod niini, gihangyo sa opisyal ang mga lokal nga kagamhanan ug mga barangay sa tibuok Northern Mindanao nga ipakatap ang maong kasayuran aron matagamtaman gyud kini sa katawhan.
