Gisaway ni Senator-judge Raffy Tulfo ang matud pa pagka-evasive ni Davao City Accountant Vingelin Bajan human nga wala dayon kini makatubag kung iya ba ang pirma nga anaa sa dokumento nga gipakita sa impeachment court.
Gipamugos ni Tulfo nga simple lamang ang iyang pangutana ug kinahanglan lamang niining kumpirmahon kung siya ba ang nipirma sa maong dokumento o dili.
Nagpasidaan usab ang Senador nga mamahimong mag-atubang sa contempt ang testigo kung magpadayon ang dili direktang pagtubag sa mga pangutana sa impeachment court.
Matud ni Tulfo, kung sa simple nga pag-ila pa lamang sa kaugalingon pirma kay dili na makahatag og klarong tubag si Bajan, mas mahimong lisud ang pagpangutana kung mas komplikadong hisgutanan na ang ilang tuki-on.
Si Bajan ang ikatulong testigo nga gipresenta sa depensa atol sa ika-41 nga adlaw sa impeachment trial batok kang Vice President Sara Duterte.
Lakip sa mga hisgutanang gitubag sa depensa kay ang kantidad nga 64,194.72 pesos nga gibayad kang Duterte niadtong tuig sa 2023 nga matud kanila kay salary differential o kalainan sa suholan lamang. (raniel mahunyag)
