Giduso sa League of Filipino Students ang pagbasura sa proyektong Pax Silica nga gipasiugdahan sa Estados Unidos ug giingong planong tukuron sa halapad nga luna sa New Clark City sa Tarlac.
Sa pakighinabi sa Bombo Radyo, gibutyag ni League of Filipino Students National Vice Chairperson Summer Libelle Espiritu nga makadaot sa panginabuhian sa mga Pilipino ang maong kasabutan nga nagtumong sa pagtukod og economic ug semiconductor industrial hub.
Gipasabot ni Espiritu nga dili lamang kayutaan sa mga mag uuma ug lumad ang makuha sa maong proyekto kon dili lakip na usab ang dakong suplay sa tubig, enerhiya, ug kritikal nga mineral sa nasud nga gamiton alang sa interes sa Amerika.
Taliwala sa nagkaduol nga pag abot ni US President Donald Trump sa Pilipinas alang sa ASEAN Summit, nanawagan ang grupo ngadto sa kabataan ug sa publiko nga maghiusa sa pagbabag sa Pax Silica ug sa tanang kasabutan nga giingong moabuso sa natural nga bahandi sa Pilipinas.
