CAGAYAN DE ORO CITY – Gikontra ni minority member District 1 City Councilor Atty. Jose Pepe Abbu Jr ang pasiatab ni committee on environment chairman District 1 City Councilor Roger Abaday nga balik-balik ug daang mga kuha nga hulagway sa basura ang namantala sa social media.
Kini ang komento Abbu sa reaksyon ni Abaday sa special report ni District 1 City Councilor Imee Moreno kabahin sa grabeng pagtapun-og sa mga basura sa pipila ka bahin sa syudad kay wala maapas paghakot sa CdeO-based Tencil Construction Incorporated sugod pa sa miaging semana.
Miingon si Abbu nga dili angayang palusot ang maong panaghap kay lehitimo ug tinood ang ang mga kuha nga mga hulagway sa mainstream media nga nagtawag atensyon sa kagamhanang-lokal nga giagi sa socmed postings.
Gipasabot sa abogado nga bisan kung bisan unsang orasa ug suruyon ang pipila ka bahin sa syudad, makita ang tinud-anay nga kahimtang sa mga basura.
Dili angayang basulon ang katawhan ug barangayan apan mangunay ang kagamhanang-lokal sa pagsulbad kung unsa man ang kasamtangang suliran sa mga basura sa dakbayan.
Masukod ang katakos ang liderato sa dakbayan pinaagi sa epektibo nga pagpasunod sa katawhan batakang balaod kabahin sa kalimpyo’g kahindik sa palibot.
Gitambagan sa konsehal ang naglangkob sa biyukrasya nga dili na molikay apan atubangon ang tinud-anay nga suliran nga dakong problema ang pagpangulekta sa mga basura sa dakbayan.(Photo: Sean ‘Double S’ Sulugan).
