CAGAYAN DE ORO CITY – Mapahamtangan sa silot-pinansyal ang CdeO-based Tencil Construction Incorporated kung matood ang gisulti niini nga sobra gatos sa ilang mga empleyado ang sunod-sunod nagpalta sa trabaho rason nga paspas ang pagdaghan sa mga basura nga wala makuha sa pipila ka bahin sa dakbayan.
Kini ang reaksyon ni minority member District 1 City Councilor Atty. Jose Pepe Abbu Jr kung tuhuan ang naluwatan nga pahayag sa kompanya kay nahimo niini ang ‘bridge of contract’ tali sa kagamhanang-lokal sa dakbayan.
Miingon si Abbu nga de kontrata ang matag-hakot sulod sa tulo ka tuig sa Tencil rason nga dayag kini nga sa iyang pagtoo nakalapas sa mga nauyunan sulod sa kontrata sa koleksyon sa basura sa dakbayan.
Nagsumikad ang puntong-legal sa abogado nunot sa subling pag-special report ni minority member District 1 City Councilor Imee Moreno sa nagtapun-og nga mga basura diin naglisod pag-apas ang 3rd party contractor sa paghipos.
Dumduman nga mitabang na ang City Public General Services sa city hall pagpanghakot sa mga basura aron lang mapadali ang pagbalik-normal sa kalimpyo sa dakbayan sugod sa miaging semana.
Sumala ni Moreno nga anaa sa 300 milyones pesos ang gabayran sa syudad alang sa paghakot ug pag-atiman sa mga basura diin natahasan ang giingong Cebu-based JOMARA ug Tencil niini.
Subay sa mga impormasyon,kutob na lang sa katapusan sa Mayo ang kontrata sa maong joint venture entities ug mag-depende na kini sa city govt kung ipa-renew sila o mokuha’g bag-ong 3rd party contractor.
Gitinguha mapatubag sa Bombo Radyo ang Tencil sa isyu pero sulti sa ilang pipila ka opisyal nga motawag ra’g balik kay anaa pa sa meeting kagahapong adlawa.
Hisayrang gibalika’g kontak sa Bombo Radyo kaganihang buntag,apan wala tubaga ang text ug mga tawag alang unta sa paghatag sa ilang katin-awan sa isyu.(Photo: Sean ‘Double S’ Sulugan).
