CAGAYAN DE ORO CITY – Nabawi’g balik sa mga personahe sa Nazareth Police Station 9 ang salapi ug ubang kabtangan nga iya sa usa ka babayeng abogada nga gikawat sa suspek sulod sa puluy-anan sa 8th-17th Streets,Brgy Nazareth ning syudad.
Kini human paspas nakadangop sa kapolisan ang biktima ug gilayong gisusi ang unod sa CCTV camera footage diin natumbok kung giunsa pagsulod sa suspek ang balay sa abogada diin gipangkuha ang mga mahalong kabtangan.
Miingon si Police Regional Office 10 spokesperson Major Joann Navarro nga pinaagi paggamit sa kapolisan sa ‘Find My iPhone location application’ naapasan nila ang suspek nga si alyas Hapi nga anaa sa gate 1 sa pantalan sa Brgy Macabalan ning syudad.
Nasuta nga gigamita’g long-nose pliers sa suspek ang kandado sa balay hinungdang nadala ang 50-mil pesos nga cash,celphone nga balor 20-mil pesos ug klase-klaseng mga alahas nga adunay bana-banang kantidad as 500-mil pesos.
Dugtong niini,gidayeg ni PRO 10 Director Brig Gen Jaysen De Guzman ang paspas nga pagtubag sa ilang mga pulis rason nadakpan ang suspek.
Gitakdang kasuhan sa pagpangawat ang maong suspek gumikan sa giatubang nga pasangil niini.
