CAGAYAN DE ORO CITY – Gihukman sa korte nga sad-an ang ilado nga abogado sa kasong obstruction of justice si Atty Alejandro ‘Joe’ Pallugna sa syudad kaganihang buntag.
Kini human nakit-an si Regional Trial Court Branch 38 Presiding Judge Emmanuel Pasal nga sad-an si Pallugna sa pagtago sa menor de edad nga didto sa Bukidnon.
Miingon si Regional State Prosecutor Merlynn Uy nga namatud-an sa prosekusyon nga dunay kalapasan sa balaod si Pallugna hinungdan gipahamtangan sa silot.
Dugang ni Uy nga sa maong konbiksyon sa korte,gimanduan ni Pasal si Pallugna nga mobayad sa monetary fine nga P6,000.
Samtang gikompirmar usab ni Pallugna nga napahamtangan siya sa maong silot sa korte.
Apan naglikay una pagkomento si Pallugna sa court ruling kay dili pa final ang hukom.
Dugang sa abogado nga dakong kapakyasan alang sa prosekusyon ang maong kaso kay bugtong siya lamang ang nahukman apan absuwelto ang laing upat ka akusado sa maong kaso.
