CAGAYAN DE ORO CITY – Gikonbikto ni RTC Branch 21 Presiding Judge Gil Bollozos ang tulo sa upat ka akusado nga nag-atubang sa kasong pagsupak sa akta republika 9165 o Dangerous Drugs Act of 2002 sa Misamis Oriental.
Kini human nakit-an ni Bollozos nga sad-an sila si Atty Michael Roa; Porferio Roa Jr ug John Rey Roa sa paggamit ug paghupot sa drogang shabu sulod sa ilang pinuy-anan sa Brgy 5,Balingasag ning lalawigan niadtong Nobyembre 2016.
Namahayag si Regional State Prosecutor Merlynn Uy nga pagkabilanggo sa tibuok kinabuhi ang atubangon nga silot ni Atty Roa ug Porferio Jr gumikan sa pagsupak sa maong balaod.
Gimanduan usab sa korte si John Rey nga mopaubos sa drug rehab sulod sa unom ka bulan diin kini nagpositibo paggamit sa ilegal nga droga.
Gipangita usab sa mga otoridad si Justine Mae Pundavela kinsa gibawia’g bail bond.
Nasayran nga nadakpan ang mga akusado dihang gilusad sa PDEA-10 ang drug buy bust operation sulod sa ancestral house sa maong lungsod niadtong Nobyembre 10,2016.
