Mas mibug-at pa ang presyur nga nabati sa senado sa pagsaka sa ihap sa mga organisasyon nga mihingusog sa hinanaling pagbukas sa impeachment proceedings sa kaso ni Vice President Sara Duterte.
Gawas sa mga progresibong pundok, lakip nga midugang sa panawagan ang gatusang ihap sa mga magtutudlo sa abogasiya sa University of the Philippines (UP) College of Law.
Namahayag si Atty. Tony La Viña, usa ka constitutional law lecturer sa UP College of Law ug eksperto sa constitutional law, nga nagka-uyon ang ilang departamento nga pakusgon ang panawagan nga sugdan na ang impeachment subay sa nakalatid sa balaod.
Siya miingon nga ang pinaka-uyukan sa pagsukod sa accountability sa tanan highranking public official mao ang proseso sa impeachment.
Una niini, Ilado si La Viña sa paghatag sa legal nga analysis sa kaso sa bise presidente nga kinsa gi-akusahan nga migamit sa iyang 125-M pesos confidential funds sulod sa 11 ka adlaw niadtong tuig 2022 ug paghulga nga pamatyon ang presidente, iyang kapikas ug house speaker pinaagi sa live interview – video streaming platform sa media.
Hinoon, kung dili mahuman sa 19th Senate ang hearing, masaligon si La Viña nga ipadayon kini sa bag-ong senado.
