“Accountability is universal”—mao kini ang pagpasabot ni kanhi CDO City Mayor ug Xavier University Law Professor Atty. Oscar Moreno kabahin sa nagpabiling taas nga rating ni Vice President Sara Duterte taliwala sa iyang giatubang nga impeachment trial.
Gipasabot sa abogado nga walay exempted sa tulubagon o accountability, sikat man sa masa o dili ang sinumbong.
Hinuon, gipunting niya nga ang tinuod nga timailhan sa usa ka impeachment mao kon ang usa ka opisyal haom pa ba o angay bang mupadayon pa sa iyang katungdanan sa opisina.
Samtang gidugang pa niya nga dili lang ang bise presidente ang dunay tulubagon, tungod kay apil usab ang presidente ug ang tanan nga nag-alagad sa gobyerno.
Giingon usab niya nga ang kakulang sa tulubagon sa taas nga ang-ang sa kagamhanan mahimong makaapektar ug makahatag og malisod nga epekto sa mga katawhan nga nagkinahanglan og saktong serbisyo.
