CAGAYAN DE ORO CITY – Gawasnong temporaryo si last termer 1st district City Councilor Zaldy Ocon batok sa warrant of arrest nga gimando sa korte nunot sa iyang 11 ka counts sa cyber libel cases nga unang gipasaka ni mayoralty candidate 1st District Rep Rolando ‘Klarex’ Uy ning syudad.
Nagsumikad ang mando ni RTC Branch 18 Presiding Judge Emmanuel Pasal nunot sa probable cause nga unang nakita sa panel of prosecutors nga naghawid sa maong mga kaso kay giakusahan ni Ocon si Klarex nga suspected druglord ning dakbayan.
Miingon si Police Regional Office 10 spokesperson Lt Col Michelle Olaivar nga boluntaryong mitahan si Ocon sa Malaybalay City Police Station sa dihang isilbi na unta ang warrant of arrest batok kaniya.
Gilayong gipaubos sa proseso sa PNP si Ocon ug sa pagkaduso niini sa tunga sa milyon ka pesos nga piyansa sa korte,gilayon kining gibuhian alang sa iyang temporaryong kagawasan kagahapong adlawa.
Samtang wala na makurat ang kampo ni Uy nga lugwa-an sa mando de aresto sa korte si Ocon ning syudad.
Namahayag ang tigpamaba ni Klarex nga si 2nd District Kag Eric Salcedo,gilauman na nila kini kay huyang ang mga depensa ni Ocon sa mga kaso nga ilang gipasaka batok kaniya sa korte.
Gibutyag sa konsehal nga gihimakak ni Ocon nga siya ang kanunay’ng mabati sa Facebook ug pakyas usab kini maka-submitar sa 2016 narco-list sa korte nga gigamit niyang basehan sa pagguba sa pagkatawo ni Klarex.
Samtang sa pikas bahin,gihangad sa langit na lang ni Ocon ang iyang pagka-dutli sa 11 ka ihap sa kasong cyber libel nga gipasaka ni Uy sa primiero distrito ning syudad.
Miingon si Ocon nga igo lang niya gituman ang sugo sa kahit-as nga ibutyag ang kamatuoran batok sa pagkatawo sa kongresista.
Gani,ang bag-o nga akusasyon sa konsehal nga migamit sa bayarang batan-ong babaye ug gipapuli-pulihan ni Klarex kaniadto apan wala na siya tumpangi niini.
