CAGAYAN DE ORO CITY – Dili angay ikabalaka sa Police Regional Office 10 ang bahad ni PNP chief Gen Benjamin Acorda Jr kabahin sa PNP Anti-Gambling Campaign Plan Operation High Ruler.
Kini nga kampanya ang nagsentro batok sa mga dinagkong porma sa ilegal nga mga pasugal nga nag-apektar sa kinitaan sa PCSO sa nasud.
Kini human giingong dagha’g accomplisment operations ang lower units sa rehiyon pag-abot sa paggukod sa mga sugarol.
Gihimo ni PRO 10 spokesperson Police Maj. Joann Navarro ang katin-awan nunot sa bahad ni Acorda nga tangtangon kadtong mga pulis nga ‘non-performing’ pag-abot sa anti-gambling operations.
Gitahasan ni Acorda ang lower units nga i-aktibo ang anti-illegal gambling special task force aron molihok ang regional,provincial,city ug municipal level pag-abot sa ‘one strike and no take policy’.
Samtang gi-depensa sa Police Regional Office 10 kon nganong wala sila sukad nakadakop sa illegal gambling lords apan mga ordinaryong sugarol lamang dinhi sa rehiyon.
Kini bisan sa dugay na usab nga paglusad sa Camp Crame sa PNP Anti-Gambling Campaign Plan Operation High Ruler aron bungkagon ang mga sindikato sa ilegal nga mga pasugal sa nasud.
Miingon si Navarro nga susama sa illegal drug lords,maglisod usab ang PNP pagtumbok sa mga sindikato nga utok sa mga pasugal sa rehiyon.
Kini ang rason nga kutob sa ordinaryong sugarol lamang ang madali-dali nila’g dakop matag-operasyon.
