Suportado sa Alliance of Concerned Teachers (ACT) Northern Mindanao ang temporaryo nga pagsuspinde sa excise tax ug value-added tax (VAT) aron matabangan ang mga katawhan nga nag-antos sa padayon nga pagsaka sa presyo sa gasolina ug uban pang mga palitunon.
Sumala ni Roland Cruz, sa grupong ACT Northern Mindanao, kini nga lakang makatabang sa pagginhawa sa mga trabahante ug ordinaryong katawhan samtang nagpadayon ang krisis sa presyo sa lana ug enerhiya.
Gipunting niya nga ang mga buhis sama sa excise ug VAT nagadugang sa kalisod sa publiko, busa ang temporaryong suspensyon niini makapamenos sa kalisod ug makahatag og relief sa sektor sa katawhan.
Gi-awhag usab ni Cruz ang gobyerno nga tan-awon ang posibilidad nga masiguro nga dili mabalik sa taas nga lebel ang presyo sa produkto samtang padayon ang pagsaka sa presyo sa merkado.
Pinaagi sa paghatag og suporta sa suspension sa buhis, naglaum ang ACT nga mahatagan og ginhawa ang katawhan ug matabangan ang ekonomiya sa lokal nga komunidad. (By James Oliver)
