Supak ang Alliance of Concerned Teachers o ACT Northern Mindanao sa plano nga pagtukod og naval base sulod sa Phividec Industrial Authority sa Tagoloan, Misamis Oriental.
Sumala ni Roland Cruz, coordinator sa maong grupo, dugay nang nagbarog ang ACT batok sa dili patas nga mga kasabutan tali sa Pilipinas ug Estados Unidos, lakip na ang mga lakang nga may kalabotan sa pagpalapad sa presensya militar sa nasud.
Kabahin sa ilang kabalaka ang posibleng epekto sa mga trabahante sa Philippine Sanjai Steel Corporation nga naglihok sulod sa Phividec area, ilabina karon nga gipaubos sa imbestigasyon ang kompanya nga nakaapekto sa ilang operasyon ug panginabuhian.
Gikasubo sa grupo ang mga naapektuhang sektor tungod sa paghatag prayoridad sa maong plano.Busa, nanawagan ang ACT Northern Mindanao nga hatagan og pagtagad ang kahimtang sa mga trabahante nga apektado samtang ginahisgutan ang plano sa pagtukod og naval base sa lugar.
