UYON si City Psychologist Rio Rosal Baliling nga kinahanglang usbon ug isuspenso una ang pagpatuman sa School Safety Drill for Active Attack Incidents sa mga tunghaan.
Nagtuo ang sikolohista nga sa maong klase sa pagbansay, posibleng maipadayag ang mga estudyante sa pamaagi nga puno sa kabangis ug kadahas nga makadaot sa ilang panghunahuna ug emosyon.
Dugang pa niya, kinahanglan usab ang saktong oryentasyon ug pagsusi sa giya sa mga guidance counselor pagkahuman sa drill aron malikayan ang trauma sa mga bata.
Gumikan niini, gipasabot sa eksperto nga kinahanglang tun-an og maayo ang maong lakang uban sa paggamit og pamaagi nga maghatag og seguridad ug kalinaw sa huna-huna alang sa tanan.
