Padayon ang adbokasiya sa Streetlight: Suga Sa Dalan Organization Inc. sa pag-edukar ug pagpanalipod sa katawhan, ilabi na sa mga batan-on, batok sa prostitution ug human trafficking, adlaw man sa gugma o dili.Namahayag sa Bombo Radyo ang administrator sa organisasyon nga si Marion Sorio nga para kanila, ang tinuod nga gugma naglakip sa buhat sama sa pagtabang, paggiya, ug paghatag og ikaduhang higayon ilabi na sa mga biktima sa maong mga krimen.Nagpahimangno usab ang Streetlight sa kabatan-onan nga kung musulod man gani sa usa ka relasyon, angay nga tan-awon ug bantayan ang ilang kahimtangan sa panglawas, lakip na ang risgo sa sexually transmitted diseases.Gipasabot ni Sorio nga dili angay kahadlokan ang pagpa-check up kay kini importante alang sa kaugalingong kahimsog ug kaluwasan.Matod pa niya, kung dili malikayan ang pagsulod sa intimate nga mga bulohaton, dili usab angay maulaw sa paggamit og hustong proteksyon.Karong bulan sa gugma, gipahinunduman ni Sorio ang tanan nga ang gugma dili lang kutob sa matam-is nga pulong ug emosyon, kundili naglakip sa responsibilidad ug pagpanalipod sa kaugmaon. (James Oliver)
