CAGAYAN DE ORO CITY – Gipanghimakak ni Lanao del Sur 1st District Cong. Zia Alonto Adiong nga minilyong salapi gikan sa liderato ni House Speaker Martin Romualdez ang bugti sa pagpirma sa 239 ka kongresista aron ipa-impeach sa puwesto si Vice Pres Sara Duterte.
Kini ang tubag sa kongresista kinsa kabahin sa mipirma sa impeachment batok Sara sa mga isyu nga anaa sa P150 million ang kada-usa sa mga magbabalaod nga misanong sa kagustuhan sa kamara.
Siya miingon nga obligasyon nila nga aksyonan ang impeachment complaint nga mismo ra usab gi-file sa ilang mga kaubang kongresista batok sa isyung pagwaldas sa confidential funds ni VP Sara sa miaging katuigan.
Si Adiong ang tipik sa daghang mga kongresista gikan sa Mindanao nga mipirma nga palagputon si VP Sara taliwala nga suportado niya kini sa miaging 2022 elections.
