Pinaagi sa sakto nga adjustment ug maayong pagdominar sa rebounds batok sa nasud sa Jordan, gibawi sa Gilas Pilipinas ang ilang dakong biya aron sakmiton ang maayong kadaugan sa basketbol sa FIBA World Cup Asian Qualifiers.
Sumala sa pamahayag ni Xavier University Crusaders Basketball Coach Rocky Calingin, bisan pa man sa hapit 18 ka puntos nga biya sa unang quarter sa dula, dako kaayo ang gitabang sa pag-usab sa ilang diskarte samtang nagpadayon ang dula.
Gawas pa niana, gidugang sa maong coach nga ang pagharos sa mga Pilipinong magdudula sa defensive rebounds batok sa kaatbang ang nag-unang hinungdan sa ilang kusog nga pagbangon sa ikaduhang tunga sa dula.
Pinasukad sa maong maayong adjustment, nituldok sa tam-is nga kadaugan sa nasud ang importanteng mga lay-up ug paspas nga pag-atake ni CJ Perez sa katapusang bahin sa dula.-
