CAGAYAN DE ORO CITY – Sugdan na sa Regional Investigation and Detection Management Division ubos sa Police Regional Office 10 ang pre-charge evaluation sa kasong administratibo batok sa napulo ka pulis nga gitudlong persons of interest sa kamatayon ni Police Corporal Jeffrey Dabuco sa Kalilangan,Bukidnon.
Kini human natapos na ang Regional Internal Service 10 sa pag-determinar kon may atrasong administratibo ba ang maong mga pulis sa nahitabong kremin sulod sa 1004th Manuever Company detachment sa maong lugar.
Miingon si Police Regional Office 10 spokesperson Police Maj. Joann Navarro nga kon masuta nga dunay daghang kalapasan sa mga palisya sa PNP ang mga sinumbong,pagkatangtang sa pagka-pulis ang ilang dangatan.
Hisayrang usa sa maong mga pulis ang nag-atubang na sa kasong murder sa piskalya sa Bukidnon.
