CAGAYAN DE ORO CITY – Gikasuhan na’g adultery ang kapikas nga babaye sa sundalo ug ang gitoohang kabit niini nga lalaki nga nagsilbing driving instructor sa piskalya ning syudad.
Kini human nasapon sa nag-reklamong sundalo nga kuyog ang uyuan niini nga retired police officer ang iyang asawa nga gi-alyasan lamang nga si Inday Marupok ug ang driver instructor nga gidagnayan usab nga si alyas Ondoy Marupok sulod sa usa ka motel diha sa Brgy Camaman-an ning syudad.
Miingon si Police Staff Sgt Rochelle Chavez,imbestigador sa Cogon Police Station nga ang piskalya na ang mag-igo sa basehan sa kaso nga gipasaka sa wala panganli nga sundalo ngadto sa mga suspek.
Sulti ni Chavez nga bulan sa Agosto pa nabantayan sa sundalo ang iyang asawa nga dunay pinasahi nga tinagdan sa maong driving instructor rason nga sekreto niya kini gipanid-an.
Miingon ang opisyal nga ikaduha na kini ma-abti sa biktima ang iyang kapikas kuyog ang suspek nga misulod sa motel apan ang una wala niya masapon kay paspas nakasibat.
Una nang nasapon ang duruha sulod sa kuwarto sa motel gamit ang Global Positioning System o GPS hinungdang gipang-aresto sa kapolisan ug kasuhan.
Apan pangatarungan sa suspek nga wala sila’y dautang gibuhat kay igo ra sila mag-estorya sulod sa bugnaw nga kuwarto.
Si alyas Inday nga 24 anyo ang dunay anak kay bag-o pa kini naminyo sa maong sundalo nga nadestino sa Arakan,North Cotabato.
Gani,sulti sa kapolisan nga gipalitan gyu’g tuyo sa sundalo sa sakyanan ang iyang kapikas hinungdang nagtagbo ang dalan ni alyas Ondoy aron siya tudluan sa pag-drive.
Hinoon,mahimong makapiyansa ang duruha apan nanganti ang sundalo nga makigbulag na kini sa iyang kapikas.
Hisayrang pulos dunay anak ang maong babaye ug gitoohang kabit niini sa dihang nasapon sa sulod sa motel sa miaging adlaw.
