Gikumpirma sa National Security Council (NSC) nga adunay mga indikasyon nga ang China manginlabot sa May 2025 Midterm Elections pinaagi sa state-sponsored troll farm operations.
Kini nga mga operasyon nagpunting sa pagdaut sa mga personalidad ug politiko nga adunay anti-China nga mga posisyon, samtang nagpaluyo sa mga kandidato nga pro-China.
Mismo si Assistant Director General Jonathan Malaya sa NSC ang mibutyag niini, atol sa hearing sa Senate Special Committee on Maritime and Admiralty Zones, kagahapon.
Sumala ni Malaya, ang mga local proxies sa China sa Pilipinas nagpalanog sa mga naratibo nga gikan sa Beijing, sama sa pagkontra sa Balikatan Exercises, nga gitratar isip hulga sa regional peace ug stability.
Gibutyag usab ni Malaya nga ang mga Filipino influencers nga nag-operate alang sa interes sa People’s Republic of China ang nagpaluyo sa baga nga ihap sa disinformation campaigns.
Si Malaya namugos nga kasagaran sa mga Pinoy bloggers ug Vloggers nagtungha sa China ug gipondohan ang ilang edukasyon sa Chinese state, samtang ang uban nag-operar pinaagi sa artificial intelligence-driven troll systems.
