GIAWHAG karon sa mga advocates ug mga abogado ang katawhan nga sundan ug tutukan ang mahinungdanong confirmation hearing nga gikatakdang ipahigayon sulod sa upat ka adlaw.
Sumala ni Atty. Beverly Musni, Secretary General sa Union of Peoples’ Lawyers in Mindanao, importante nga ang publiko mismo motan-aw ug mosubay sa maong proseso aron masabtan pag-ayo ang legal nga pamaagi nga ginabuhat sa gobyerno.
Matod ni Musni, pinaagi sa pagsubay sa confirmation hearing, makakat-on ang mga Pilipino unsaon paglihok sa hustisya sa pormal nga paagi ug unsay mga lakang nga ginahimo sa mga otoridad sa pag-evaluate sa mga opisyal o appointees.
Dugang pa niya, ang maong kahibalo makatabang aron malikayan ang sayop nga pagsabot o dali nga paghusga sa umaabot nga mga susamang panghitabo.
Giingon usab niya nga kon mas maalam ang katawhan sa legal nga proseso, mas kahibalo sila unsaon pagpangita og hustisya pinaagi sa insakto ug legal nga dalan.Ang maong pahayag gihimo samtang nagkaduol ang pagsugod sa confirmation hearing nga ginapaabot nga pagatambongan ug pagasubayon sa nagkalain laing sektor sa katilingban. (James oliver)
