CAGAYAN DE ORO CITY- Giangkon sa militar nga ang napatay nila nga si Owayda Marohomsar alyas Abu Dar ang responsable pagpabuto’g bomba sa Kyla Bistro sulod sa Limketkai Rosario Arcade ning syudad unom ka tuig na ang nakalabay.
Gihimo ni AFP Western Mindanao Command spokesperson Lt Col Gerry Besana ang kumpirmasyon dungan sa paghatag katin-awan nga hingpit nang namatay si Abu Dar sa engkuwentro sa lungsod sa Tubaran,Lanao del Sur.
Miingon si Besana nga gawas sa Kyla Bistro bombing nga gikamatay sa 10 ka tawo nga naglakip sa board member sa Misamis Oriental,nalambigit usab si Abu Dar sa laing mga pagpamomba sa ubang bahin sa Mindanao.
Si Abu Dar ang gitudlo na unta sa ISIS group nga mangulo sa mga terorista sa Asya isip hulip kang Isnilon Hapilon nga napatay sa militar sa gubat sa Marawi City niadtong Oktubre 2017.
