CAGAYAN DE ORO CITY- Negatibo ang report kalabot na sa posibleng “spill-over” sa engkwentro sa militar batok bandidong grupong abu sayyaf nga nanghasi sa Bohol.
Gihupay ni PNP-10 spokesperson Supt Lemuel Gonda ang kabalaka nga posibleng nagpasilong sa duha sa labing sikat nga isla sa Camiguin ang uban pang sakop sa mga bandido.
Gihimo ni Gonda ang pahayag ilabina nga duol lamang sa Bohol ang mga isla sa Mantigue ug White Island sa Camiguin.
Sa miaging adlaw,gihunong ang pagpasulod sa mga turista sa maong dapit sa kalisang nga molusob ang mga bandido.
Hisayrang daghang mga pulis ug sundalo ang gikatag sa isla tungod sa libuang turista ug deboto ang midagsa alayon sa pagtamod sa semana santa.
