CAGAYAN DE ORO CITY – Dakong tabang sa kasundulahan ang laraw ni Pres Rodrigo Duterte nga mohatag reward nga 50 milyon pesos sa mga sakop sa rebeldeng NPA nga makapatay sa ilang lider.
Gibutyag ni 403rd IB,Philippine Army commander Brig Gen Edgardo de Leon nga gihimo ni Pres Duterte ang reward system tungod sa nadawat niini nga impormasyon nga daghang sakop sa NPA ang gusto mobalik sa gobyerno apan ginapugngan sa ilang commanders.
Apan gitin-aw ni De Leon nga ila unang hulaton ang pormal nga kamanduan ngadto kanila gikan sa presidente sa nasud.
Samtang dili sulbad ang paghatag minilyong salapi ni Duterte ngadto sa NPA members nga makapatay sa ilang lideres sa insurhensiya sa nasud.
Kini ang reaksyon ni Iglesia Filipina Independiente o IFI Bishop Felixberto Calang kabahin sa reward system nga gusto mahitabo ni Duterte.
Miingon si Calang angay nga mahatagan sa sulbad ang mga rason kon nganong dunay nagrebelde sa taas na nga panahon.
Gihingusgan pa gihapon ni Calang nga mabalik ang peace talks tali sa gobierno ug CPP-NPA-NDF nga giwagtang ni Duterte.
