(Update) CAGAYAN DE ORO CITY – Gikataw-an lamang sa militar ang pasiatab sa CPP-NPA nga sila ang mipahagsa sa Huey chopper sa Philippine Air Force hinungdan sa kamatayon sa 7 ka sundalo sa Brgy Bolunay,Impasug-ong,Bukidnon.
Gibutyag ni 403rd IB,Philippine Army commander Brig Gen Ferdinand Barandon nga miskay lamang sa hitabo ang mga rebelde aron ipatoo sa katawhan nga lig-on pa ang ilang puwersa.
Namahayag si Barandon nga bugtong ang PAF investigators lamang ang dunay igo nga kasayuran kon unsay rason sa pagkahagsa sa maong helicopter sa miaging Sabado sa hapon.
Samtang gikompirmar usab sa heneral nga atua sa Mactan,Cebu sila pilot in command Lt Col Arnie Arroyo, co-pilot 2Lt Mark Anthony Caabay, PAF gunner Staff Sgt Mervin Bersabe ug Air Force 1st Class Stephen Agarrado kagahapong adlawa.
Kini isip pagsunod sa protocols ayha ihatod sa tagsa-tagsa ka pamilya sama kang Arroyo nga taga- Zamboanga City.
Nakahaya na usab sila si Army Sgt Julius Salvado, CAA member Jhamel Sugalang kay pulos lamang sila taga-Bukidnon samtang si CAFGU Active Auxiliary member Jerry Ayucdo ang nahatod na usab sa Caraga kagahapon sa hapon.
