CAGAYAN DE ORO CITY – Gikondinar sa militar ang pagbanhig sa mga rebeldeng New Peoples Army sa convoy ni Eastern Mindanao Command-Directorate for Integrated Police Operations deputy director Police Brigadier General Joselito Salido nga gikamatay sa usa ka pulis samtang tulo ang samaran sa KM 26, Barangay Tikalaan, Talakag Bukidnon.
Gibutyag ni Eastern Mindanao -DIPO Command spokesperson Lt Col Ezra Balagte nga paghudas ug dili tawhanon ang gihimo sa mga armadong grupo.
Dugtong niini, ilang pahugtan ang joint manhunt operation tali na sa kapolisan aron madakpan ang mga nakasibat nga rebelde.
Samtang naglaum si Tikalaan Brgy Kapitan Jeffrey Gamat nga paminawon sa militar ug kapulisan ang ilang hangyo nga pahugtan ang seguridad diin nahitabo ang pagpamanhig sa convoy ni Salido sa Talakag,Bukidnon.
Siya miingon nga gi-isnaban lamang sa mga otoridad ang iyang hangyo kaniadto nga butangan sa checkpoint o outpost ang lugar ilabina nga dili lamang kini ang unang hitabo nga adunay gibanhigan.
Kahinumduman nga niadtong tuig 2017, gi-ambush sa rebeldeng NPA ang mga personahe sa Bumbaran Police Station diin namataty ang 4 month-old nga batang babaye dihang nadamay sa hitabo.
