CAGAYAN DE ORO CITY-Giangkon sa Armed Forces of the Philippines nga naglisod sila sa ilang pursuit operation batok sa grupo ni Maute-ISIS commander Owayda Benito Marohomsar alyas Abu Dar sa bukid nga bahin sa Tubaran ug Pagawayan, Lanao del Sur.
Matud ni Joint Task Force Ranao deputy commander Col Romeo Brawner nga tungod kini sa snipers ug improvised explosive devices nga gibutang sa mga terorista sa combat terrain nga agianan sa mga sundalo sa maong lugar.
Naglaum ang AFP nga matabangan sila nga mapadali ang pagsikop kang Abu Dar pinaagi sa P6 million pesos nga gitanyag nga reward money sa lokal nga kagamhanan sa Lanao del Sur.
Nagpaggawas sa reward money ang lokal nga kagamhanan aron matabangan ang militar nga masikop ang grupo ni Abu Dar.
Una nang giangkon ni Col Brawner nga mas naglisod ang mga sundalo itandi sa giyera sa Marawi City tungod sa lapad nga terrain ug nagkabulag-bulag ang mga sakop ni Abu Dar.
Apan gitin-aw sa Joint Task Force Ranao deputy commander nga mas maampingon ang mga sundalo sa ilang matag lihok aron makalikay sa peligro nga giandam sa mga terorista.
Siya miingon nga manimalos ang mga sakop ni Abu Dar ilabina nga namatyan sila’g lima sa gilusad nga aerial ug ground assaults sa miaging adalw.
Asoy pa niini nga ila usab paningkamutan nga dili na masubli pa ang nahitabo nga Marawi siege.
