CAGAYAN DE ORO CITY – Gi-depensa sa liderato sa armadong kusog sa nasud ang ilang gilusad nga operasyong-militar batok sa Sub-Regional Committee 2 Headquarters Loader ug Regional Sentro De Gravidad Compaq nga ubos North Central Mindanao Regional Committee sa syudad sa Malaybalay,Bukidnon.
Kini bisan kon nagpatuman sa duha ka adlaw nga unilateral ceasefire ang liderato sa CPP-NPA kay aron makasaulog nga malinawo ang katawhan sa pasko ug mismo usab sila sa ilang anibersaryo ning adlawa.
Miingon si AFP chief of staff Gen Romeo Brawner Jr nga wala mosanong ang gobierno sa tanyag sa CPP-NPA hinungdang mi-resulta kamatayon sa siyam ka rebelde ug pagkabawi sa walo ka armas sa magkalahing brgy diin natigayon ang katag-katag nga engkuwentro sa mismong kasaulugan sa pasko sa miaging kadlawon.
Siya miingon nga hangtod nga dili mo-surender ang mga nabiling mga rebelde,magpadyon ang ilang operasyong-militar.Dugtong niini,gihugtan pa sa Police Regional Office 10 ang ilang koordinasyon ngadto sa militar kabahin sa mga ilusad nga focused anti-CPP-NPA operations palibot sa rehiyon.
Kini ilabina nga dali nga target sa NPA combatants ang mga estsasyon ug detachments sa kapolisan nga nahimutang sa mga suok nga bahin sa kalungsuran.
Gihimo ni PRO 10 spokesperson Police Maj. Joann Navarro ang pahayag nunot sa opensibang-militar nga gilusad sa 403rd IB,Philippine Army diin siyam ka sakop sa NPA rebels ang napatay sa upat ka hugna sa engkuwentro sa Malaybalay City,Bukidnon kagahapon sa kadlawon.
Gilauman sa Camp Alagar nga dunay posibleng pagbalos nga himoon ang CPP-NPA ilabina nga mitanyag sila sa duha ka adlaw nga unilateral ceasefire alang sa pasko ug mismo nila nga anibersaryo ning adlawa apan wala tagda sa gobierno.
Sa pikas bahin,dili angayang mawad-an sa interes ug kaikag ang panig sa gobierno pagpangita’g mga paagi aron hingpit makab-ot ang lahutay nga kahusay’g kalinaw sa nasud.
Kini ang reaksyon ni CWGG 10 convenor Atty. Antonio Soriano sa halos pagdumili sa kagamhanan nga mobalik sa hisgutanang peace talks ang gobierno ug CPP-NPA aron makakab-ot sa klaro nga sulbad sa daghang suliran nga giatubang sa nasud.
Siya miingon nga angayang ipadayon na lang ang mga maayong nasugdan sa naunang mga peace talk negotiation ug pangitaan sa alternatibong solusyon ang bahin sa mga isyu nga pulos naglisod ang duha ka panig sa mga negosyador.
