CAGAYAN DE ORO CITY-Mas gihugtan pa karon sa 4th ID, Philippine Army ang ilang intelligence monitoring ubos sa ilang area of responsibility. Kini aron masanta ang posibleng plano sa mga bandidong Abusayyaf nga mangatake sa amihang mindanao, sama sa ilang gihimong pag-atake sa probinsiya sa Bohol.
Matud ni 4th ID spokesperson Capt. Joe Patrick Martinez nga nakigkoordinar sila sa PNP, Philippine Coast Guard ug uban pang security forces aron maseguro nga dili makasulod ang mga bandido sa mga lugar nga ilang nahisakopan.
Si Martinez miingon nga lakip sa mga lugar nga ilang gibantayan nga posibleng sayon lamang nga sudlon sa Abusayyaf, mao ang isla sa Camiguin ug Siargao Island.
Sama sa militarya, gihugtan usab sa kapolisan ang ilang pagbantay sa tanang mga lugar sa amihang mindanao nga posibleng sayon lamang nga sudlon sa mga bandidong Abusayyaf.
Matud ni PNP-10 spokesperson Supt. Lemuel Gonda nga anaa karon sa ‘hightened alert status’ ang kapolisan sa rehiyon aron masanta ang posibleng pag-atake sa mga bandido sama sa ilang gihimo sa probinsiya sa Bohol.
Si Gonda namahayag nga hugot ang ilang koordinasyon sa militar ug ilang gipalapdan ang checkpoints sa amihang mindanao, ilabina dinhi sa syudad ug lalawigan aron masanta ang dautang plano sa mga bandido.
