CAGAYAN DE ORO CITY -Namugos ang militar ug kapolisan nga ‘fake news’ ang gisulti sa pipila ka residente nga gisudla’g armadong grupo rason nga nanghikling ang gatusang pamilya sa Sitio Batinay,Brgy Tagpangi padulong sa mas luwas nga lugar sa syudad.
Kini bisan sa pahayag sa mga residente nga nakit-an nila ang pipila niini nga miagi sa lugar sa miaging adlaw.
Namahayag si Cagayan de Oro City Police Office spokesperson Police Supt Mardi Hortillosa nga sama sa militar,gibarugan nila nga dili tinood nga may armadong mga pundok nga nakaagi sa maong lugar.
Una nang namahayag sa Bombo Radyo ang menor de edad nga lalaki nga mismo siya ang nakakita sa armadong grupo apan dili lamang maka-kompirmar kon dunay dala nga mga armas.
Samtang gikontra sa brgy officials ang gipamugos sa militar ug kapolisan nga ‘fake news’ ang misulod nga armadong grupo maong lugar.
Kini bisan nag-resulta pa sa libuang pagbakwit sa mga residente gikan sa Tagpangi,Brgy Pagalungan ug Lumbia sa kahadlok sa maong grupo.
Namahayag si Tagpangi Brgy Kap Anniecris Sabang nga mas gitoohan nila ang sulti sa katawhan itandi sa mga otoridad nga ayha ra nakasulod sa lugar nga wala na ang grupo nga gikahadlukan libuang residente sa tulo ka hinterland barangays ning syudad.
Dugtong niini,gihupay ni 65th IB,Philippine Army commander 1Lt Louie Heredja ang gibating kabalaka sa mga residente.
Sumala ni Heredja nga bisan nag-negatibo sa presensya sa mga rebelde ang lugar,pabutangan nila kini’g mga sundalo aron dili na magpanic ang katawhan.
Sa pikas bahin,gihimakak sa rebeldeng New Peoples Army o NPA nga sila ang armadong grupo gipasabot sa katawhan nga nagdala’g kahadlok dihang misulod sa tulo ka brgy sa syudad.
Giklaro ni CPP-NPA North Central Mindanao Regional Committee spokesperson Ka Malem Mabini nga walay ilang kauban nga nanghasi sukwahi sa pagduda sa pipila ka residente sa maong lugar.
Nagtoo si Ka Malem nga posibleng laing armadong grupo ang nakita sa katawhan sa maong lugar.
Namugos si Mabini nga wala sila mahadlok sa batikos sa katawhan rason nga wala nila angkona nga ilang sakop ang misulod sa Sitio Batinay diin nag-resulta sa pagbakwit sa miaging gabii.
