CAGAYAN DE ORO CITY-Gi-depensa ni 4th ID commander Maj Gen Ronald Villanueva ang sunod-sunod nga pagtahan sa aktibong miembro sa mga rebeldeng New People’s Army o NPA ilabina gikan sa Northern Mindanao.
Kini human dungan gi-presentar sa PNP-10 ug 4th ID,Philippine Army ang laing upat ka NPA surrenderees nga dala ang ilang mga armas gikan sa Valencia City,Bukidnon.
Namugos si Villanueva nga lehitimong miembro sa NPA ang mitahan sa PNP sa Sitio Bulacao, Brgy. Conception,Valencia City sukwahi sa mga pagduda.
Katin-awan kini ni Villanueva sa Bombo Radyo dihang gidi-an ang NPA surrenderees nga ipaubos sa pipila ka pangutana atol sa media presentation sa Camp Alagar ning syudad kagahapong adlawa.
Samtang giawhag ni PNP regional director C/Supt Timoteo Pacleb ang mga rebeldeng NPA nga anaa pa sa pagtagu-tago nga isalikway na ang armado nila nga pakigbisog batok sa gobierno.
Gihimo ni Pacleb ang pagdani tungod sa hingpit pagbalik sa gobierno sa upat ka aktibong NPA combatants bitbit ang ilang mga armas sa PNP sa Valencia City,Bukidnon sa miaging adlaw.
Miingon si Pacleb nga naghulat kanila ang mga programa sa gobierno hinungdan dili kini angay sayangon sa mga rebelde.
Una niini,gibutyag ni Villanueva nga gitinguha nila sa PNP nga madugangan pa ang 42 ka NPA surrederees sa rehiyon aron hingpit mahugno ang kalihukan sa mga komunista.
