CAGAYAN DE ORO CITY-Kumbinsido ang kapolisan nga napatay na sa militar ang katapusang lider sa grupong Maute-ISIS nga naglihok sa bukirang bahin sa Lanao del Sur.
Kini human gibutyag ni Police Supt. Madzgani Mukaraam, provincial director sa Lanao del Sur Police Provincial Office nga kabahin si Benito Marahomsar alyas Abu Dar sa walo ka terorista nga napatay sa military offensive sa Pagayawan,Lanao Sur sa miaging semana.
Miingon si Mukaraam nga 99 porsiento sila nga nagtoo nga si Abu Dar ang napatay sa militar subay sa pisikal nga diskripsyon niini ug ubang ebedensiya nga nakuhan gikan kaniya sa miaging semana.
Gani,gipaubos na sa DNA sampling ang specimen ni Abu Dar alang sa kumpirmasyon niini.
Samtang gitin-aw ni AFP Westmincom spokesperson Lt.Col. Gerry Besana nga dili pa gihapon mahunong ang ilang pakigbatok sa mga extremist group bisan sa kamatayon ni Abu Dar sa Lanao del Sur.
Miingon si AFP Westmincom spokesperson Lt.Col. Gerry Besana nga bisan kon nawala na si Abu Dar apan wala kini nagkahulugan nga dali masanta ang extremism teaching nga gitudlo ngadto sa mga terorista.
Nagtoo si Besana nga hangtud magpabilin ang maong idolohiya, magpadayon ang mga teroristang pagpangatake sa pulo sa Mindanao.
