CAGAYAN DE ORO CITY- Gipasalig karon sa militar nga dili basta-basta makalusot pabiya ang teroristang Abu Sayyaf ug Maute Group nga ilang gika-engkuwentro sa Lanao del Sur padulong sa Northern Mindanao.
Kini bisan nga halos 2-mil ka residente na ang mihikling sa kalisang nga maipit sa engkuwentro sa duha ka panig.Si Tabak 1st Division,Philippine Army spokesperson Lt Col Jo-ar Herrera miingon nga nalukong nila ang area diin nakatago ang mga terorista.
Sa pagkakaron,wala pa’y mahatag si Herrera nga ihap sa posibleng napatay sa militar nga mga bandido sukad miulbo ang engkuwentro sa miaging semana.
Samtang gipahugtan karon sa PNP-10 kuyog ang militar ang pasulod ug pagawas nga bahin sa rehiyon.Kini aron masanta ang posibleng pagsulod sa sakop sa bandidong Abu Sayyaf Group ug Maute nga gigukod sa militar sa duha ka lungsod sa Lanao del Sur.
Si PNP regional spokesperson Supt Lemuel Gonda miingon nga wala nila wad-an ang panaghap nga mohimo’g divertionary tactic ang mga terororista tungod sa opensiba nga gilusad sa militar sukad pa sa miaging semana.
Gani,dul-ag 500 ka pamilya na ang nanghikling gikan sa lungsod sa Piagapo ug Wao sa Lanao Sur tungod sa maong kagubot.
