CAGAYAN DE ORO CITY- Gitawag ni AFP chief of staff Gen Eduardo Año nga dakong grupo sa mafia ang CPP-NPA-NDF nga naglihok dinhi sa nasud.
Gihimo ni Año ang pahayag tungod sa paghinay sa maong grupo sa bandang Luzon ug Visayas ug migamit sa mga lumad sa ilang pagpangilkil dinhi sa Mindanao.
Si Año miingon nga dili na haom ang pakigbisog gamit ang armas kay gisalindot na kini sa ubang kanasuran nga kanhi mi-adaptar sa idolihiyang komunismo.
Samtang namugos ang grupong National Democratic Front o NDF nga padayon nga nagbaton sila sa suporta gikan sa katawhan sa nasud.
Kini sukwahi sa propaganda nga gilugwa sa militar batok sa CPP-NPA-NDF nga gikulang na ang suporta tungod sa pulos bakak nga pasalig niini sa katawhan.
Gibutyag ni NDF peace consultant Alfredo Mapano alyas Ka Pares nga epektibo pa gihapon ang ilang paagi aron ipadayag sa tawo ang kapungot niini batok sa mga abuso sulo sa gobierno.
