CAGAYAN DE ORO CITY-Gi-awhag sa kasundaluhan ang mga sibilyan nga mag-protesta sa himoong pagdumdom sa anibersaryo sa rebeldeng New People’s Army sa Marso 29 ning tuiga.
Gibutyag ni 403rd Infantry Brigade commander Col Edgardo de Leon nga mas maayo nga dumdumon sa maong adlaw ang pagpanghasi nga binuhatan sa mga armadong grupo diin nakapasamot sa kapobrehon sa mga mag-uuma tungod sa pagpanunog sa mga ekipo sa plantasyon.
Dugang ni De Leon nga giggamit sa mga rebeldeng NPA ang mga sibilyan isip ilang soft target ug makapangatake sa gobyerno.
Samtang gipanganti sa CPP-NPA’s North Central Mindanao Sub-Regional Committee nga pamatud-an nila sa militar nga pabiling lig-on ang grupo sa pagdumdom sa pagkamugna sa ilang kalihukan sa Marso 29 ning tuiga.
Miingon si Ka Malem Mabini,tigpamaba sa rebeldeng NPA nga dili mahuman ang rebolusyonaryong kalihukan kon dili mahataga’g kasulbaran ang mga nag-unang problema sa nasud ilabina ang kapobrehon.
Gitawag usab sa mga rebeldeng NPA nga dili epektibo ang balik-baril program ug E-CLIP program sa gobyerno tungod kay gabalik-balik lang ang mga surrenderee.
