CAGAYAN DE ORO CITY-Gibahara’g balik sa liderato sa 4th ID,Philippine Army ang ilang kasundaluhan nga dili magpakasayop pagsulod sa bisyo nga paggamit o pagbaligya sa gidiling droga.
Kini tungod kay nasayod na pagkawala sa serbisyo ang dangatan sa mga sundalo nga masapon sa paggamit ilabina sa shabu.
Gihimo ni 4th ID,Philippine Army spokesperson Capt Joe Patrick Martinez ang pasidaan tungod sa pagkasikop ni PFC Arnold Bitay diin nakuhaa’g sachets sa shabu ug nag-positibo usab sa paggamit niini.
Si Bitay ang ikalima nga sundalo sulod ning tuiga nga nasapon paggamit ug pagbaton sa gidiling droga dihang gipaubos sa random nga pagsusi sa ilang kadagkuan.
Una nang gibutyag ni AFP nga dili sila magduha-duha nga wad-on sa serbisyo ang mga sundalo nga nalambigit sa paggamit o pagbaligya’g droga numero uno nga kontra ni Presidente Rodrigo Duterte.
