CAGAYAN DE ORO CITY-Gikataw-an lang sa 8th IB Philippine Army ang akusasyon sa mga rebeldeng New People’s Army o NPA nga usa ka extortionist ug madagmalon nga pagkatawo ang dinagit nila nga opisyal sa sundalo nga si Technical Sergeant Joseph Valmores Paredes.
Matud ni 8th IB Civil Military Operation officer 1Lt Erwin Bugarin nga walay kamatooran ang akusasyon sa mga rebeldeng NPA.
Gani, wala sila’y katungod nga mohimo’g imbestigasyon batok sa mga sundalo tungod kay dili sila mga law enforcers.
Gihagit ni Bugarin ang NPA nga silotan ang ilang mga kaugalingon kung tinood nga dili sila ganahan sa mga tawong gapangilkil ug mapahimuslanon.
Si Bugarin miingon nga naila ang mga NPA nga “professional extortionist”.
Mas maayo nga ilang areglahon ang ilang kalihukan ayha mohimo’g kataw-anan nga lakang.
Una nang gikumpirma sa mga NPA nga dugay pa nila nga mabuhian si Paredes tungod kay ilang nadiskobrehan nga nalambigit kini sa pagpangilkil sa Valencia City, Bukidnon.
